એ ગામ જ્યાં ગાંધીજીએ ઐતિહાસિક સભા સંબોધી હતી

30 જાન્યુઆરી એટલે રાષ્ટ્રીય શહીદ દિવસ. આજ દિવસે દેશના રાષ્ટ્રપિતા મહાત્મા ગાંધીજીની હત્યા કરી દેવામાં આવી હતી માટે આ દિવસને આપણે ગાંધી નિર્વાણ દિવસ તરીકે યાદ કરીએ છીએ. આજે આપણે સુરતના એક એવા ગામવની વાત કરીશું જ્યાં ગાંધીજીએ બે દિવસ રોકાઇ એક જાહેરસભા સંબોધી હતી.

ભીમરાડ ગામ ખાતે જ્યાં રાષ્ટ્રપિતા મહાત્મા ગાંધીજીએ 9 એપ્રિલ, 1930માં એક જાહેરસભા સંબોધી હતી. સુરતના આ સ્થળ પર મહાત્મા ગાંધીજી બે દિવસ રોકાયા હતા. ગાંધીજીનો સુરતના આ ગામથી અનેરો સંબંધ રહ્યો છે, કારણ કે લોકો આ જાહેરસભાથી પ્રેરાઇને આઝાદીની લડાઈમાં સહયોગ કર્યો હતો.

દેશભરમાં ગાંધી નિર્વાણ દિવસે ગાંધીજીને શ્રદ્ધાંજલિ આપવામાં આવી રહી છે, ત્યારે સુરતમાં ભીમરાડ ગામ છે, જે ગામને મોટા ભાગના લોકો ઓળખતા પણ નથી. આ ગામનો ગાંધીજી સાથે અનેરો સંબંધ રહ્યો છે. આજે એટલે કે મંગળવારે ગાંધી નિર્વાણ દિવસના રોજ આપણે ગાંધીજીની એ જાહેરસભાને યાદ કરીએ. જેમાં ગાંધીજીએ લોકોને દેશની આઝાદી માટે સંબોધિત કર્યા હતા. આ જાહેરસભા 9 એપ્રિલ 1930ના રોજ યોજાઇ હતી. જેમાં 10 હજારથી વધુ લોકો હાજર રહ્યા હતા. આ ઐતિહાસિક સભામાં ગોળ અને ચણા વહેંચવામાં આવ્યા હતા.

આ એતિહાસિક જાહેરસભાના સાક્ષી અને ગાંધીજીને રૂબરૂ મળનાર 98 વર્ષીય મોટાઇબેન પટેલ અને 102 વર્ષના પ્રભુભાઈ હતા, હાલમાં પ્રભુભાઈનું અવસાન થઈ ગયું છે. જ્યારે 98 વર્ષના મોટાઈબેન હજુ હયાત છે. આઝાદીની લડત અને સત્યાગ્રહ વખતે ગાંધીજી દ્વારા જે કાર્યક્રમો ભીમરાડ ગામમાં કરવામાં આવ્યા હતા. તે તમામના સાક્ષી એવા મોટાઈબેન પટેલ આજે પણ ગાંધીજી સાથેની મુલાકાત અને ઐતિહાસિક સભાને યાદ કરે છે.

આ ભીમરાડ ગામના અગ્રણી બળવંતભાઈ પટેલ કહે છે કે, "અમે તમામ ગ્રામજનો ખુબ જ નસીબદાર છીએ કે ગાંધીજીએ આઝાદીની લડત વખતે અમારા ગામમાં જાહેરસભા કરી હતી, તે સભાને અને ગાંધીજીને નજરે જોનાર મોટાઈબેન અમારા બા આજે પણ અમારા ગામમાં હયાત છે. તેમણે વધુમાં કહ્યું કે, મોટાઈબેન પાસેથી અમે ઘણીવાર ગાંધીજીની ઐતિહાસિક સભા વિશે સાંભળ્યું છે, અમને ગર્વ છે કે તે ઐતિહાસિક સભાના સાક્ષી મોટાઈ બા અમારી વચ્ચે છે.

મોટાઈ બા તે સમયે એ સભામાં હાજર હતા. ગાંધીજીની સભા વખતે તેઓ માત્ર 15 કે 16 વર્ષના હતા. આ સભા તેમણે પણ જોઈ હતી અને ગાંધીજીને રૂબરૂ સાંભળ્યા પણ હતા. તે વખતની ગાંધીજીની પ્રતિભા આજે પણ મોટાઈ બા ઘણીવાર યાદ કરે છે.